Last Updated :
06 July 2026, 07:25 PM IST
ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਆਪਣੀ ਤੀਜੀ ਇੰਡੋਨੇਸ਼ੀਆ ਯਾਤਰਾ 'ਤੇ ਸੋਮਵਾਰ ਨੂੰ ਪਹੁੰਚੇ, ਜਿੱਥੇ ਹਵਾਈ ਸੀਮਾ 'ਤੇ ਹੀ ਮੇਜ਼ਬਾਨ ਦੇਸ਼ ਦੇ ਫਾਈਟਰ ਜੈੱਟਾਂ ਨੇ ਉਨ੍ਹਾਂ ਦੇ ਵਿਮਾਨ ਨੂੰ ਐਸਕਾਰਟ ਕੀਤਾ। ਰਾਸ਼ਟਰਪਤੀ ਪ੍ਰਬੋਵੋ ਸੁਬਿਆੰਤੋ ਨੇ ਹਵਾਈ ਅੱਡੇ 'ਤੇ ਉਨ੍ਹਾਂ ਦਾ ਭਰਵਾਂ ਸਵਾਗਤ ਕੀਤਾ। ਦੋਵਾਂ ਆਗੂਆਂ ਵਿਚਕਾਰ ਮੁਲਾਕਾਤ ਦੌਰਾਨ ਰੱਖਿਆ ਖੇਤਰ ਵਿੱਚ ਇੱਕ ਅਹਿਮ ਸੌਦੇ — ਕਰੀਬ ₹2,500 ਕਰੋੜ ਦੀ ਬ੍ਰਹਮੋਸ ਸੁਪਰਸੋਨਿਕ ਮਿਜ਼ਾਈਲ ਡੀਲ — ਨੂੰ ਮਨਜ਼ੂਰੀ ਮਿਲਣ ਦੀ ਪੂਰੀ ਸੰਭਾਵਨਾ ਹੈ।
ਪੀਐੱਮ ਮੋਦੀ ਦੇ ਦੌਰੇ ਦੀ ਇੱਕ ਹੋਰ ਵਿਸ਼ੇਸ਼ ਗੱਲ ਇਹ ਹੈ ਕਿ ਉਹ ਇੰਡੋਨੇਸ਼ੀਆ ਦੇ ਪ੍ਰਸਿੱਧ ਪ੍ਰੰਬਾਨਨ ਹਿੰਦੂ ਮੰਦਰ ਵਿੱਚ ਵੀ ਸ਼ਰਧਾ ਵਿਅਕਤ ਕਰਨਗੇ। ਇਹ ਮੰਦਰ 9ਵੀਂ ਸਦੀ ਵਿੱਚ ਬਣਿਆ ਸੀ, ਜੋ ਤ੍ਰਿਦੇਵ (ਬ੍ਰਹਮਾ, ਵਿਸ਼ਨੂੰ, ਮਹੇਸ਼) ਨੂੰ ਸਮਰਪਿਤ ਹੈ ਅਤੇ ਯੂਨੈਸਕੋ ਦੀ ਵਿਸ਼ਵ ਵਿਰਾਸਤ ਸੂਚੀ ਦਾ ਹਿੱਸਾ ਹੈ।
ਇੰਡੋਨੇਸ਼ੀਆ ਭਾਵੇਂ ਦੁਨੀਆ ਦੀ ਸਭ ਤੋਂ ਵੱਡੀ ਮੁਸਲਿਮ ਆਬਾਦੀ ਵਾਲਾ ਦੇਸ਼ ਹੈ, ਪਰ ਇੱਥੋਂ ਦੀ ਸਭਿਆਚਾਰਕ ਵਿਰਾਸਤ ਵਿੱਚ ਹਿੰਦੂ-ਬੌਧ ਪਰੰਪਰਾਵਾਂ ਅੱਜ ਵੀ ਡੂੰਘੀ ਰੂੜ੍ਹੀਆਂ ਹੋਈਆਂ ਹਨ। ਦੇਸ਼ ਦੀ ਰਾਸ਼ਟਰੀ ਏਅਰਲਾਈਨ ਦਾ ਨਾਂ 'ਗਰੁੜ' ਹੈ, ਇੱਥੋਂ ਦੇ ਕਰੰਸੀ ਨੋਟਾਂ 'ਤੇ ਭਗਵਾਨ ਗਣੇਸ਼ ਦੀ ਤਸਵੀਰ ਛਪੀ ਰਹੀ ਹੈ, ਅਤੇ ਰਾਮਲੀਲਾ ਵਰਗੇ ਸਭਿਆਚਾਰਕ ਪ੍ਰੋਗਰਾਮ ਵੀ ਪੂਰੇ ਉਤਸ਼ਾਹ ਨਾਲ ਮਨਾਏ ਜਾਂਦੇ ਹਨ।
ਰਣਨੀਤਕ ਨਜ਼ਰੀਏ ਤੋਂ ਵੇਖੀਏ ਤਾਂ ਇੰਡੋਨੇਸ਼ੀਆ ਦਾ ਸਾਬੰਗ ਬੰਦਰਗਾਹ ਅੰਡਮਾਨ-ਨਿਕੋਬਾਰ ਟਾਪੂ ਸਮੂਹ ਦੇ ਬਹੁਤ ਨੇੜੇ ਹੈ। ਭਾਰਤ ਅਤੇ ਇੰਡੋਨੇਸ਼ੀਆ ਨੇ 2018 ਵਿੱਚ ਮੋਦੀ ਦੀ ਜਕਾਰਤਾ ਯਾਤਰਾ ਦੌਰਾਨ ਇਸ ਬੰਦਰਗਾਹ ਦੇ ਵਿਕਾਸ ਅਤੇ ਖੇਤਰੀ ਸਮੁੰਦਰੀ ਸੁਰੱਖਿਆ, ਸਮੁੰਦਰੀ ਸੰਪਰਕ ਅਤੇ ਲੌਜਿਸਟਿਕ ਸਹਿਯੋਗ ਨੂੰ ਮਜ਼ਬੂਤ ਕਰਨ ਲਈ ਸਹਿਮਤੀ ਜ਼ਾਹਰ ਕੀਤੀ ਸੀ, ਜਿਸ ਨੂੰ ਹੁਣ ਹੋਰ ਰਫ਼ਤਾਰ ਮਿਲਣ ਦੀ ਉਮੀਦ ਹੈ।
ਜੇਕਰ ਇਹ ਮਿਜ਼ਾਈਲ ਸੌਦਾ ਮੁਕੰਮਲ ਹੁੰਦਾ ਹੈ ਤਾਂ ਇੰਡੋਨੇਸ਼ੀਆ ਫਿਲੀਪੀਂਸ ਮਗਰੋਂ ਬ੍ਰਹਮੋਸ ਨੂੰ ਖਰੀਦਣ ਵਾਲਾ ਦੂਜਾ ਵਿਦੇਸ਼ੀ ਦੇਸ਼ ਬਣ ਜਾਵੇਗਾ। ਬ੍ਰਹਮੋਸ ਮਿਜ਼ਾਈਲ DRDO (ਭਾਰਤ) ਅਤੇ ਰੂਸ ਦੀ 'ਐੱਨ.ਪੀ.ਓ. ਮਾਸ਼ੀਨੋਸਟ੍ਰੋਏਨੀਆ' ਦੇ ਸਾਂਝੇ ਉੱਦਮ ਦੀ ਦੇਣ ਹੈ, ਅਤੇ ਇਹ ਦੁਨੀਆ ਦੀਆਂ ਸਭ ਤੋਂ ਤੇਜ਼ ਰਫ਼ਤਾਰ ਵਾਲੀਆਂ ਸੁਪਰਸੋਨਿਕ ਕਰੂਜ਼ ਮਿਜ਼ਾਈਲਾਂ ਵਿੱਚ ਗਿਣੀ ਜਾਂਦੀ ਹੈ। ਇਸ ਸੌਦੇ ਨਾਲ ਦੋਵਾਂ ਦੇਸ਼ਾਂ ਦੇ ਰੱਖਿਆ ਸਬੰਧਾਂ ਨੂੰ ਇੱਕ ਨਵਾਂ ਮੁਕਾਮ ਮਿਲਣ ਦੀ ਸੰਭਾਵਨਾ ਹੈ।
