Last Updated :
29 June 2026, 04:41 PM IST
Courtesy: Credit: OpenAI
Aarogya Setu 2.0 ਨੂੰ ਆਯੁਸ਼ਮਾਨ ਭਾਰਤ ਡਿਜ਼ਿਟਲ ਮਿਸ਼ਨ ਤਹਿਤ ਤਿਆਰ ਕੀਤਾ ਗਿਆ ਹੈ। ਇਹ ਹੁਣ ਸਿਰਫ਼ ਕੋਵਿਡ ਨਾਲ ਜੁੜਿਆ ਐਪ ਨਹੀਂ ਰਹੇਗਾ, ਸਗੋਂ ਇੱਕ ਸੰਪੂਰਨ ਡਿਜ਼ਿਟਲ ਹੈਲਥ ਪਲੇਟਫਾਰਮ ਵਜੋਂ ਕੰਮ ਕਰੇਗਾ। ਯੂਜ਼ਰ ਆਪਣੀ ਸਿਹਤ ਨਾਲ ਸੰਬੰਧਿਤ ਕਈ ਸੇਵਾਵਾਂ ਇੱਕੋ ਐਪ ਰਾਹੀਂ ਵਰਤ ਸਕਣਗੇ। ਸਰਕਾਰ ਦਾ ਕਹਿਣਾ ਹੈ ਕਿ ਯੂਜ਼ਰ ਦੀ ਮਨਜ਼ੂਰੀ ਤੋਂ ਬਿਨਾਂ ਉਸ ਦਾ ਕੋਈ ਵੀ ਮੈਡੀਕਲ ਡਾਟਾ ਕਿਸੇ ਨਾਲ ਸਾਂਝਾ ਨਹੀਂ ਕੀਤਾ ਜਾਵੇਗਾ।
ਇਸ ਐਪ ਰਾਹੀਂ ਲੋਕ ਆਪਣੀ ABHA (Ayushman Bharat Health Account) ID ਆਸਾਨੀ ਨਾਲ ਬਣਾ ਅਤੇ ਸੰਭਾਲ ਸਕਣਗੇ। ਇਹ ਇੱਕ ਵਿਲੱਖਣ ਹੈਲਥ ਆਈਡੀ ਹੋਵੇਗੀ, ਜਿਸ ਨਾਲ ਵੱਖ-ਵੱਖ ਹਸਪਤਾਲਾਂ ਅਤੇ ਹੈਲਥ ਸੈਂਟਰਾਂ ਦੀ ਮੈਡੀਕਲ ਜਾਣਕਾਰੀ ਇੱਕੋ ਥਾਂ ਉਪਲਬਧ ਰਹੇਗੀ। ਲੈਬ ਰਿਪੋਰਟਾਂ, ਡਾਕਟਰ ਦੀਆਂ ਪਰਚੀਆਂ, ਡਿਸਚਾਰਜ ਸਮਰੀ ਅਤੇ ਹੋਰ ਮੈਡੀਕਲ ਦਸਤਾਵੇਜ਼ ਮੋਬਾਈਲ ਵਿੱਚ ਡਿਜ਼ਿਟਲ ਰੂਪ ਵਿੱਚ ਸੁਰੱਖਿਅਤ ਰੱਖੇ ਜਾ ਸਕਣਗੇ ਅਤੇ ਲੋੜ ਪੈਣ 'ਤੇ ਡਾਕਟਰ ਨਾਲ ਤੁਰੰਤ ਸਾਂਝੇ ਵੀ ਕੀਤੇ ਜਾ ਸਕਣਗੇ।
Aarogya Setu 2.0 ਰਾਹੀਂ ਯੂਜ਼ਰ ਆਪਣੇ ਨੇੜਲੇ ਹਸਪਤਾਲ, ਡਾਕਟਰ, ਡਾਇਗਨੋਸਟਿਕ ਸੈਂਟਰ ਅਤੇ ਬਲੱਡ ਬੈਂਕ ਦੀ ਜਾਣਕਾਰੀ ਵੀ ਪ੍ਰਾਪਤ ਕਰ ਸਕਣਗੇ। ਐਪ ਵਿੱਚ ਦਿੱਤਾ ਗਿਆ Scan and Share ਫੀਚਰ OPD ਰਜਿਸਟ੍ਰੇਸ਼ਨ ਨੂੰ ਤੇਜ਼ ਅਤੇ ਆਸਾਨ ਬਣਾਏਗਾ, ਜਿਸ ਨਾਲ ਹਸਪਤਾਲਾਂ ਵਿੱਚ ਲੰਬੀਆਂ ਲਾਈਨਾਂ ਵਿੱਚ ਖੜ੍ਹੇ ਰਹਿਣ ਦੀ ਲੋੜ ਘੱਟ ਹੋਵੇਗੀ ਅਤੇ ਇਲਾਜ ਜਲਦੀ ਸ਼ੁਰੂ ਕੀਤਾ ਜਾ ਸਕੇਗਾ।
ਐਪ ਰਾਹੀਂ ਇਲਾਜ ਨਾਲ ਸੰਬੰਧਿਤ ਭੁਗਤਾਨ ਵੀ QR ਕੋਡ ਸਕੈਨ ਕਰਕੇ ਡਿਜ਼ਿਟਲ ਢੰਗ ਨਾਲ ਕੀਤਾ ਜਾ ਸਕੇਗਾ। ਇਸ ਤੋਂ ਇਲਾਵਾ ਇੱਕੋ ਅਕਾਊਂਟ ਰਾਹੀਂ ਪੂਰੇ ਪਰਿਵਾਰ ਦੇ ਮੈਂਬਰਾਂ ਦਾ ਹੈਲਥ ਰਿਕਾਰਡ ਸੰਭਾਲਿਆ ਜਾ ਸਕੇਗਾ। ਖ਼ਾਸ ਕਰਕੇ ਬੱਚਿਆਂ ਅਤੇ ਬਜ਼ੁਰਗਾਂ ਦੀ ਮੈਡੀਕਲ ਹਿਸਟਰੀ ਨੂੰ ਇੱਕ ਥਾਂ ਰੱਖਣਾ ਕਾਫ਼ੀ ਆਸਾਨ ਹੋ ਜਾਵੇਗਾ।
ਪ੍ਰਧਾਨ ਮੰਤਰੀ ਜਨ ਆਰੋਗਿਆ ਯੋਜਨਾ (PM-JAY) ਦੇ ਲਾਭਪਾਤਰੀ ਇਸ ਐਪ ਰਾਹੀਂ ਯੋਜਨਾ ਨਾਲ ਜੁੜੇ ਹਸਪਤਾਲਾਂ ਦੀ ਜਾਣਕਾਰੀ, ਉਪਲਬਧ ਇਲਾਜ ਅਤੇ ਹੋਰ ਲਾਭਾਂ ਬਾਰੇ ਜਾਣ ਸਕਣਗੇ। ਨਾਲ ਹੀ Aarogya Setu 2.0 ਨੂੰ DigiLocker ਨਾਲ ਵੀ ਜੋੜਿਆ ਜਾਵੇਗਾ, ਜਿਸ ਨਾਲ ਸਾਰੇ ਮੈਡੀਕਲ ਦਸਤਾਵੇਜ਼ ਸੁਰੱਖਿਅਤ ਰਹਿਣਗੇ ਅਤੇ ਉਨ੍ਹਾਂ ਦੇ ਗੁੰਮ ਹੋਣ ਦੀ ਚਿੰਤਾ ਵੀ ਖ਼ਤਮ ਹੋ ਜਾਵੇਗੀ।
ਸਰਕਾਰ ਨੇ ਭਰੋਸਾ ਦਿੱਤਾ ਹੈ ਕਿ ਐਪ ਵਿੱਚ ਯੂਜ਼ਰ ਦੀ ਨਿੱਜੀ ਜਾਣਕਾਰੀ ਦੀ ਪੂਰੀ ਸੁਰੱਖਿਆ ਕੀਤੀ ਜਾਵੇਗੀ। ਮੈਡੀਕਲ ਡਾਟਾ ਸਾਂਝਾ ਕਰਨ ਲਈ ਯੂਜ਼ਰ ਦੀ ਮਨਜ਼ੂਰੀ ਲਾਜ਼ਮੀ ਹੋਵੇਗੀ ਅਤੇ ਡਾਟਾ ਦੀ ਸੁਰੱਖਿਆ ਲਈ ਐਨਕ੍ਰਿਪਸ਼ਨ ਵਰਗੀ ਆਧੁਨਿਕ ਤਕਨਾਲੋਜੀ ਵਰਤੀ ਜਾਵੇਗੀ। ਮਾਹਿਰਾਂ ਦਾ ਮੰਨਣਾ ਹੈ ਕਿ ਇਹ ਪਲੇਟਫਾਰਮ ਦੇਸ਼ ਵਿੱਚ ਡਿਜ਼ਿਟਲ ਹੈਲਥ ਸਿਸਟਮ ਨੂੰ ਹੋਰ ਮਜ਼ਬੂਤ ਬਣਾਉਣ ਵੱਲ ਇੱਕ ਮਹੱਤਵਪੂਰਨ ਕਦਮ ਸਾਬਤ ਹੋ ਸਕਦਾ ਹੈ।
