Last Updated :
03 July 2026, 05:47 PM IST
ਖਾਣੇ ਦਾ ਸੁਆਦ ਵਧਾਉਣ ਲਈ ਅਦਰਕ-ਲਹਿਸੁਣ ਪੇਸਟ ਦਾ ਇਸਤੇਮਾਲ ਲਗਭਗ ਹਰ ਘਰ ਵਿੱਚ ਕੀਤਾ ਜਾਂਦਾ ਹੈ। ਪਰ ਕੀ ਤੁਸੀਂ ਕਦੇ ਸੋਚਿਆ ਹੈ ਕਿ ਬਾਜ਼ਾਰ ਵਿੱਚੋਂ ਲਿਆਂਦਾ ਗਿਆ ਪੇਸਟ ਕਿੰਨਾ ਸਾਫ਼-ਸੁਥਰਾ ਹੁੰਦਾ ਹੈ? ਸੋਸ਼ਲ ਮੀਡੀਆ 'ਤੇ ਅਕਸਰ ਅਜਿਹੇ ਵੀਡੀਓ ਵਾਇਰਲ ਹੁੰਦੇ ਹਨ, ਜਿਨ੍ਹਾਂ ਵਿੱਚ ਬਾਜ਼ਾਰੀ ਖਾਣ-ਪੀਣ ਦੀਆਂ ਚੀਜ਼ਾਂ ਘਟੀਆ ਸਫ਼ਾਈ ਨਾਲ ਤਿਆਰ ਕੀਤੀਆਂ ਜਾਂਦੀਆਂ ਦਿਖਾਈ ਦਿੰਦੀਆਂ ਹਨ। ਅਜਿਹੇ ਵਿੱਚ ਸਭ ਤੋਂ ਵਧੀਆ ਉਪਾਅ ਇਹ ਹੈ ਕਿ ਅਸੀਂ ਇਨ੍ਹਾਂ ਚੀਜ਼ਾਂ ਨੂੰ ਆਪਣੇ ਘਰ 'ਚ ਹੀ ਤਿਆਰ ਕਰੀਏ। ਖ਼ਾਸ ਕਰਕੇ ਅਦਰਕ-ਲਹਿਸੁਣ ਪੇਸਟ, ਜੋ ਕਿ ਬਣਾਉਣ ਵਿੱਚ ਬਹੁਤ ਸੌਖਾ ਹੈ, ਪਰ ਕੁਝ ਗੱਲਾਂ ਦਾ ਧਿਆਨ ਰੱਖਣਾ ਬਹੁਤ ਜ਼ਰੂਰੀ ਹੈ ਤਾਂ ਜੋ ਇਹ ਲੰਮੇ ਸਮੇਂ ਤੱਕ ਚੱਲ ਸਕੇ।
ਇੰਸਟਾਗ੍ਰਾਮ 'ਤੇ ਇੱਕ ਸ਼ੈੱਫ ਦੁਆਰਾ ਸਾਂਝਾ ਕੀਤੇ ਗਏ ਵੀਡੀਓ ਵਿੱਚ ਉਨ੍ਹਾਂ ਦੱਸਿਆ ਕਿ ਲਹਿਸੁਣ ਨੂੰ ਛਿੱਲਣ ਲਈ ਪਹਿਲਾਂ ਇਸਨੂੰ ਚਾਕੂ ਨਾਲ ਹਲਕਾ ਜਿਹਾ ਕੱਟ ਲਓ। ਫਿਰ ਇੱਕ ਬਰਤਨ ਵਿੱਚ ਇਸ ਕੱਟੇ ਹੋਏ ਲਹਿਸੁਣ ਨੂੰ ਪਾਓ ਅਤੇ ਉਸ ਵਿੱਚ ਥੋੜ੍ਹਾ ਜਿਹਾ ਮੈਦਾ ਜਾਂ ਕੌਰਨ ਫਲੋਰ ਮਿਲਾਓ। ਆਪਣੇ ਹੱਥਾਂ ਨਾਲ ਹੌਲੀ-ਹੌਲੀ ਰਗੜੋ ਅਤੇ ਕੁਝ ਦੇਰ ਛੱਡ ਦਿਓ। ਫਿਰ ਬਰਤਨ ਨੂੰ ਹਿਲਾਓ ਤਾਂ ਲਹਿਸੁਣ ਦਾ ਛਿਲਕਾ ਆਪਣੇ ਆਪ ਉੱਪਰ ਆ ਜਾਵੇਗਾ, ਜਿਸਨੂੰ ਤੁਸੀਂ ਆਸਾਨੀ ਨਾਲ ਵੱਖ ਕਰ ਸਕਦੇ ਹੋ। ਇਸ ਤੋਂ ਬਾਅਦ ਲਹਿਸੁਣ ਨੂੰ ਪਾਣੀ ਨਾਲ ਚੰਗੀ ਤਰ੍ਹਾਂ ਧੋ ਲਓ।
ਬਹੁਤ ਸਾਰੇ ਲੋਕਾਂ ਨੂੰ ਇਹ ਨਹੀਂ ਪਤਾ ਹੁੰਦਾ ਕਿ ਪੇਸਟ ਵਿੱਚ ਕਿੰਨੀ ਅਦਰਕ ਅਤੇ ਕਿੰਨਾ ਲਹਿਸੁਣ ਪਾਉਣਾ ਚਾਹੀਦਾ ਹੈ। ਸ਼ੈੱਫ ਮੁਤਾਬਕ ਜੇਕਰ ਤੁਸੀਂ 1 ਕਿਲੋ ਲਹਿਸੁਣ ਦਾ ਪੇਸਟ ਬਣਾ ਰਹੇ ਹੋ ਤਾਂ ਇਸ ਵਿੱਚ 400 ਤੋਂ 500 ਗ੍ਰਾਮ ਅਦਰਕ ਪਾਉਣੀ ਚਾਹੀਦੀ ਹੈ। ਇਹ ਅਨੁਪਾਤ ਨਾ ਸਿਰਫ਼ ਸਵਾਦ ਲਈ, ਸਗੋਂ ਲੰਮੀ ਸਟੋਰੇਜ ਲਈ ਵੀ ਸਭ ਤੋਂ ਵਧੀਆ ਮੰਨਿਆ ਜਾਂਦਾ ਹੈ।
ਜਦੋਂ ਅਦਰਕ ਅਤੇ ਲਹਿਸੁਣ ਕੱਟ ਕੇ ਤਿਆਰ ਹੋ ਜਾਣ, ਤਾਂ ਉਨ੍ਹਾਂ ਨੂੰ ਗ੍ਰਾਈਂਡਰ ਵਿੱਚ ਪਾਓ। ਪਰ ਧਿਆਨ ਰੱਖਣ ਵਾਲੀ ਸਭ ਤੋਂ ਅਹਿਮ ਗੱਲ ਇਹ ਹੈ ਕਿ ਪੇਸਟ ਨੂੰ ਪੀਸਦੇ ਸਮੇਂ ਪਾਣੀ ਬਿਲਕੁਲ ਨਾ ਪਾਓ। ਜ਼ਿਆਦਾਤਰ ਲੋਕ ਇਹੀ ਗ਼ਲਤੀ ਕਰਦੇ ਹਨ, ਜਿਸ ਕਾਰਨ ਪੇਸਟ ਜਲਦੀ ਖ਼ਰਾਬ ਹੋ ਜਾਂਦਾ ਹੈ। ਇਸ ਦੀ ਬਜਾਏ, ਗ੍ਰਾਈਂਡਰ ਵਿੱਚ ਥੋੜ੍ਹੀ ਜਿਹੀ ਮਾਤਰਾ ਵਿੱਚ ਕੋਈ ਵੀ ਖਾਣ ਵਾਲਾ ਤੇਲ (ਜਿਵੇਂ ਸਰ੍ਹੋਂ, ਸੂਰਜਮੁਖੀ ਜਾਂ ਜੈਤੂਨ ਦਾ ਤੇਲ) ਪਾਓ ਅਤੇ ਚੰਗੀ ਤਰ੍ਹਾਂ ਪੀਸ ਲਓ। ਇਹ ਤੇਲ ਪੇਸਟ ਨੂੰ ਲੰਮੇ ਸਮੇਂ ਤੱਕ ਤਾਜ਼ਾ ਰੱਖਣ ਵਿੱਚ ਮਦਦ ਕਰਦਾ ਹੈ। ਇਸ ਤਰ੍ਹਾਂ ਬਣਿਆ ਹੋਇਆ ਅਦਰਕ-ਲਹਿਸੁਣ ਪੇਸਟ ਜੇਕਰ ਤੁਸੀਂ ਸਾਫ਼ ਸੁੱਕੀ ਬੋਤਲ 'ਚ ਭਰ ਕੇ ਫ੍ਰਿੱਜ 'ਚ ਰੱਖੋ, ਤਾਂ ਇਹ 6 ਮਹੀਨਿਆਂ ਤੱਕ ਆਸਾਨੀ ਨਾਲ ਚੱਲ ਸਕਦਾ ਹੈ।
• ਪੇਸਟ ਨੂੰ ਹਮੇਸ਼ਾ ਸਾਫ਼, ਸੁੱਕੇ ਚੱਮਚ ਨਾਲ ਕੱਢੋ।
• ਫ੍ਰਿੱਜ ਵਿੱਚੋਂ ਕੱਢਣ ਤੋਂ ਬਾਅਦ ਇਸਨੂੰ ਖੁੱਲ੍ਹਾ ਜ਼ਿਆਦਾ ਦੇਰ ਨਾ ਛੱਡੋ।
• ਲੰਮੀ ਸਟੋਰੇਜ ਲਈ ਉੱਪਰੋਂ ਇੱਕ ਪਤਲੀ ਲੇਅਰ ਤੇਲ ਪਾ ਕੇ ਸੀਲ ਕਰ ਦਿਓ।
