ਰੋਹਿਤ ਸ਼ਰਮਾ ਵਨਡੇ ਵਰਲਡ ਕੱਪ-2027 ਖੇਡਣਗੇ ਜਾਂ ਨਹੀਂ? ਅਜਿੰਕਿਆ ਰਹਾਣੇ ਨੇ ਚੋਣਕਾਰਾਂ ਨੂੰ ਦਿੱਤੀ ਵੱਡੀ ਸਲਾਹ

ਪਿਛਲੇ ਤਕਰੀਬਨ ਇੱਕ ਸਾਲ ਤੋਂ ਭਾਰਤੀ ਕ੍ਰਿਕੇਟ 'ਚ ਇਹੀ ਚਰਚਾ ਹੈ ਕਿ ਰੋਹਿਤ ਅਗਲੇ ਸਾਲ ਵਨਡੇ ਵਰਲਡ ਕੱਪ-2027 ਖੇਡਣਗੇ ਜਾਂ ਨਹੀਂ। ਉਨ੍ਹਾਂ ਦੀ ਉਮਰ ਅਤੇ ਫਿਟਨੈੱਸ ਨਾਲ ਜੁੜੇ ਸਵਾਲਾਂ ਕਾਰਨ ਉਨ੍ਹਾਂ ਦੇ ਭਵਿੱਖ ਨੂੰ ਲੈ ਕੇ ਲਗਾਤਾਰ ਚਰਚਾ ਹੋ ਰਹੀ ਹੈ। ਇਸ ਵਿਚਾਲੇ ਅਜਿੰਕਿਆ ਰਹਾਣੇ ਨੇ ਕਿਹਾ ਕਿ ਚੋਣਕਾਰਾਂ ਅਤੇ ਭਾਰਤੀ ਕ੍ਰਿਕਟ ਕੰਟਰੋਲ ਬੋਰਡ ਨੂੰ ਰੋਹਿਤ ਨਾਲ ਸਿੱਧੀ ਅਤੇ ਸਪੱਸ਼ਟ ਗੱਲਬਾਤ ਕਰਨੀ ਚਾਹੀਦੀ ਹੈ।

ਨਵੀਂ ਦਿੱਲੀ: ਰੋਹਿਤ ਨੂੰ ਵਨਡੇ ਕ੍ਰਿਕਟ ਦੇ ਸਭ ਤੋਂ ਸ਼ਾਨਦਾਰ ਅਤੇ ਤਜਰਬੇਕਾਰ ਬੱਲੇਬਾਜ਼ਾਂ ਵਿੱਚ ਗਿਣਿਆ ਜਾਂਦਾ ਹੈ, ਪਰ ਪਿਛਲੇ ਤਕਰੀਬਨ ਇੱਕ ਸਾਲ ਤੋਂ ਭਾਰਤੀ ਕ੍ਰਿਕੇਟ 'ਚ ਇਹੀ ਚਰਚਾ ਹੈ ਕਿ ਰੋਹਿਤ ਅਗਲੇ ਸਾਲ ਵਨਡੇ ਵਰਲਡ ਕੱਪ-2027 ਖੇਡਣਗੇ ਜਾਂ ਨਹੀਂ। ਹਾਲ ਹੀ ਦੇ ਦਿਨਾਂ 'ਚ ਰੋਹਿਤ ਦੇ ਰਿਟਾਇਰਮੇਂਟ ਦੀ ਵੀ ਗੱਲ ਉੱਠੀ ਸੀ। ਰੋਹਿਤ ਸ਼ਰਮਾ ਦੀ ਅਗਵਾਈ ਵਿੱਚ ਭਾਰਤੀ ਟੀਮ ਨੇ 2023 ਦੇ ਵਨਡੇ ਵਿਸ਼ਵ ਕੱਪ ਵਿੱਚ ਆਪਣੇ ਘਰੇਲੂ ਮੈਦਾਨਾਂ 'ਤੇ ਸ਼ਾਨਦਾਰ ਪ੍ਰਦਰਸ਼ਨ ਕੀਤਾ ਸੀ। ਟੀਮ ਨੇ ਟੂਰਨਾਮੈਂਟ ਦੇ ਲਗਭਗ ਹਰ ਪੜਾਅ 'ਤੇ ਦਬਦਬਾ ਬਣਾਇਆ ਅਤੇ ਫਾਈਨਲ ਤੱਕ ਦਾ ਸਫ਼ਰ ਤੈਅ ਕੀਤਾ। ਹਾਲਾਂਕਿ, ਹੁਣ ਉਨ੍ਹਾਂ ਦੀ ਉਮਰ ਅਤੇ ਫਿਟਨੈੱਸ ਨਾਲ ਜੁੜੇ ਸਵਾਲਾਂ ਕਾਰਨ ਉਨ੍ਹਾਂ ਦੇ ਭਵਿੱਖ ਨੂੰ ਲੈ ਕੇ ਲਗਾਤਾਰ ਚਰਚਾ ਹੋ ਰਹੀ ਹੈ। 

ਵੱਧਦੀ ਉਮਰ ਨੇ ਵਧਾਈਆਂ ਭਵਿੱਖ ਬਾਰੇ ਚਰਚਾਵਾਂ

ਰੋਹਿਤ ਸ਼ਰਮਾ ਹੁਣ 39 ਸਾਲ ਦੇ ਹੋ ਚੁੱਕੇ ਹਨ। ਇਸੇ ਕਾਰਨ ਪਿਛਲੇ ਕੁਝ ਮਹੀਨਿਆਂ ਵਿੱਚ ਜਦੋਂ ਵੀ ਭਾਰਤ ਨੇ ਕੋਈ ਵਨਡੇ ਸੀਰੀਜ਼ ਖੇਡੀ, ਮੈਚਾਂ ਤੋਂ ਇਲਾਵਾ ਰੋਹਿਤ ਦੇ ਸੰਨਿਆਸ ਅਤੇ ਉਨ੍ਹਾਂ ਦੇ ਕਰੀਅਰ ਨੂੰ ਲੈ ਕੇ ਚਰਚਾ ਜ਼ਿਆਦਾ ਰਹੀ। ਕਈ ਵਾਰ ਇਹ ਵੀ ਸਵਾਲ ਉਠਿਆ ਕਿ ਕੀ ਭਾਰਤੀ ਟੀਮ ਨੂੰ 2027 ਵਿਸ਼ਵ ਕੱਪ ਲਈ ਹੁਣ ਤੋਂ ਹੀ ਨਵੀਂ ਪੀੜ੍ਹੀ ਵੱਲ ਵਧਣਾ ਚਾਹੀਦਾ ਹੈ ਜਾਂ ਤਜਰਬੇਕਾਰ ਰੋਹਿਤ ਨੂੰ ਇੱਕ ਹੋਰ ਵੱਡੇ ਟੂਰਨਾਮੈਂਟ ਲਈ ਤਿਆਰ ਕੀਤਾ ਜਾਣਾ ਚਾਹੀਦਾ ਹੈ।

ਅਜਿੰਕਿਆ ਰਹਾਣੇ ਨੇ ਚੋਣਕਾਰਾਂ ਨੂੰ ਦਿੱਤੀ ਵੱਡੀ ਸਲਾਹ

ਰੋਹਿਤ ਸ਼ਰਮਾ ਦੇ ਭਵਿੱਖ ਨੂੰ ਲੈ ਕੇ ਚੱਲ ਰਹੀ ਬਹਿਸ ਵਿਚਕਾਰ ਉਨ੍ਹਾਂ ਦੇ ਸਾਬਕਾ ਸਾਥੀ ਖਿਡਾਰੀ ਅਜਿੰਕਿਆ ਰਹਾਣੇ ਨੇ ਆਪਣੀ ਚੁੱਪੀ ਤੋੜੀ। ਉਨ੍ਹਾਂ ਦਾ ਮੰਨਣਾ ਹੈ ਕਿ ਰੋਹਿਤ ਵਰਗੇ ਕੱਦ ਵਾਲੇ ਖਿਡਾਰੀ ਨੂੰ ਹਰ ਸੀਰੀਜ਼ ਤੋਂ ਬਾਅਦ ਉਸ ਦੇ ਭਵਿੱਖ ਦੇ ਪੈਮਾਨੇ 'ਤੇ ਨਹੀਂ ਤੋਲਿਆ ਜਾਣਾ ਚਾਹੀਦਾ। ਉਨ੍ਹਾਂ ਦੇ ਅਨੁਸਾਰ ਚੋਣਕਾਰਾਂ ਅਤੇ ਭਾਰਤੀ ਕ੍ਰਿਕਟ ਕੰਟਰੋਲ ਬੋਰਡ ਨੂੰ ਰੋਹਿਤ ਨਾਲ ਸਿੱਧੀ ਅਤੇ ਸਪੱਸ਼ਟ ਗੱਲਬਾਤ ਕਰਨੀ ਚਾਹੀਦੀ ਹੈ।

ਰਹਾਣੇ ਨੇ ਦਲੀਲ ਦਿੱਤੀ ਕਿ ਜੇਕਰ ਟੀਮ ਪ੍ਰਬੰਧਨ ਅਤੇ ਚੋਣਕਾਰ ਚਾਹੁੰਦੇ ਹਨ ਕਿ ਰੋਹਿਤ 2027 ਦਾ ਵਨਡੇ ਵਿਸ਼ਵ ਕੱਪ ਖੇਡਣ, ਤਾਂ ਉਨ੍ਹਾਂ ਨੂੰ ਹੁਣੇ ਹੀ ਇਸ ਬਾਰੇ ਆਪਣਾ ਭਰੋਸਾ ਦੇਣਾ ਚਾਹੀਦਾ ਹੈ। ਉਨ੍ਹਾਂ ਮੁਤਾਬਕ, ਕਿਸੇ ਵੀ ਤਜਰਬੇਕਾਰ ਖਿਡਾਰੀ ਲਈ ਆਪਣੀ ਭੂਮਿਕਾ ਅਤੇ ਭਵਿੱਖ ਬਾਰੇ ਸਪੱਸ਼ਟਤਾ ਹੋਣਾ ਬਹੁਤ ਜ਼ਰੂਰੀ ਹੈ। ਜਦੋਂ ਖਿਡਾਰੀ ਦੇ ਮਨ ਵਿੱਚ ਲਗਾਤਾਰ ਇਹ ਸਵਾਲ ਨਾ ਹੋਵੇ ਕਿ ਅਗਲੀ ਸੀਰੀਜ਼ ਵਿੱਚ ਉਸ ਨੂੰ ਮੌਕਾ ਮਿਲੇਗਾ ਜਾਂ ਨਹੀਂ, ਤਾਂ ਉਹ ਆਪਣੀ ਬੱਲੇਬਾਜ਼ੀ 'ਤੇ ਪੂਰਾ ਧਿਆਨ ਕੇਂਦਰਿਤ ਕਰ ਸਕਦਾ ਹੈ।

ਪਿਛਲੇ 15 ਵਨਡੇ ਮੈਚਾਂ 'ਚ ਰੋਹਿਤ ਦਾ ਸ਼ਾਨਦਾਰ ਪ੍ਰਦਰਸ਼ਨ

ਜੇਕਰ ਅਕਤੂਬਰ 2025 ਤੋਂ ਹੁਣ ਤੱਕ ਦੇ ਰੋਹਿਤ ਸ਼ਰਮਾ ਦੇ ਵਨਡੇ ਪ੍ਰਦਰਸ਼ਨ 'ਤੇ ਨਜ਼ਰ ਮਾਰੀ ਜਾਵੇ ਤਾਂ ਉਨ੍ਹਾਂ ਦੇ ਅੰਕੜੇ ਕਾਫ਼ੀ ਪ੍ਰਭਾਵਸ਼ਾਲੀ ਦਿਖਾਈ ਦਿੰਦੇ ਹਨ। ਪਿਛਲੇ 15 ਵਨਡੇ ਮੈਚਾਂ ਵਿੱਚ ਰੋਹਿਤ ਨੇ ਕਈ ਮਹੱਤਵਪੂਰਨ ਪਾਰੀਆਂ ਖੇਡੀਆਂ ਹਨ। ਇਸ ਦੌਰਾਨ ਉਨ੍ਹਾਂ ਦੇ ਬੱਲੇ ਤੋਂ 120 ਤੋਂ ਵੱਧ ਦੌੜਾਂ ਦੀਆਂ ਦੋ ਵੱਡੀਆਂ ਪਾਰੀਆਂ ਆਈਆਂ, ਜਦਕਿ ਚਾਰ ਵਾਰ ਉਹ 70 ਦੌੜਾਂ ਦਾ ਅੰਕੜਾ ਪਾਰ ਕਰਨ ਵਿੱਚ ਸਫਲ ਰਹੇ।

ਲਾਰਡਸ 'ਚ 138 ਦੌੜਾਂ ਦੀ ਪਾਰੀ ਨੇ ਫਿਰ ਜਿੱਤਿਆ ਭਰੋਸਾ

ਇੰਗਲੈਂਡ ਖ਼ਿਲਾਫ਼ ਲਾਰਡਸ ਵਨਡੇ ਵਿੱਚ ਰੋਹਿਤ ਸ਼ਰਮਾ ਨੇ ਜਿਸ ਤਰ੍ਹਾਂ ਬੱਲੇਬਾਜ਼ੀ ਕੀਤੀ, ਉਸ ਨੇ ਉਨ੍ਹਾਂ ਦੇ ਆਲੋਚਕਾਂ ਨੂੰ ਜਵਾਬ ਦੇਣ ਦੇ ਨਾਲ-ਨਾਲ ਪ੍ਰਸ਼ੰਸਕਾਂ ਦਾ ਭਰੋਸਾ ਵੀ ਮਜ਼ਬੂਤ ਕੀਤਾ। ਰੋਹਿਤ ਨੇ ਇਸ ਮੈਚ ਵਿੱਚ 138 ਦੌੜਾਂ ਦੀ ਸ਼ਾਨਦਾਰ ਪਾਰੀ ਖੇਡੀ ਸੀ। ਇਸ ਪਾਰੀ ਤੋਂ ਬਾਅਦ ਉਨ੍ਹਾਂ ਨੂੰ ਟੀਮ ਤੋਂ ਬਾਹਰ ਕਰਨ ਦੀਆਂ ਗੱਲਾਂ ਕਰਨ ਵਾਲਿਆਂ ਨੂੰ ਵੀ ਆਪਣੇ ਰੁਖ 'ਤੇ ਮੁੜ ਵਿਚਾਰ ਕਰਨਾ ਪਿਆ।