Last Updated :
09 August 2026, 04:23 PM IST
Courtesy: ai image
ਨਵੀਂ ਦਿੱਲੀ: ਅਮਰੀਕਾ ਅਤੇ ਈਰਾਨ ਵਿਚਾਲੇ ਚੱਲ ਰਹੇ ਟਕਰਾਅ ਨੂੰ ਕਰੀਬ ਛੇ ਮਹੀਨੇ ਹੋਣ ਵਾਲੇ ਹਨ। ਭਾਵੇਂ ਇਸ ਸਮੇਂ ਜੰਗੀ ਕਾਰਵਾਈਆਂ ਵਿੱਚ ਕੁਝ ਠਹਿਰਾਅ ਦਿਖਾਈ ਦੇ ਰਿਹਾ ਹੈ, ਪਰ ਕੋਈ ਹੱਲ ਨਾ ਨਿਕਲਣ ਕਾਰਨ ਅਮਰੀਕੀ ਫੌਜ ਦੀ ਮੱਧ-ਪੂਰਬ ਵਿੱਚ ਤਾਇਨਾਤੀ ਅਜੇ ਵੀ ਜਾਰੀ ਹੈ। ਇਸ ਲੰਬੀ ਤਾਇਨਾਤੀ ਦਾ ਅਸਰ ਹੁਣ ਅਮਰੀਕੀ ਨੇਵੀ ਦੇ ਸਭ ਤੋਂ ਵੱਡੇ ਜੰਗੀ ਜਹਾਜ਼ਾਂ ਵਿੱਚ ਸ਼ਾਮਲ USS Abraham Lincoln 'ਤੇ ਤਾਇਨਾਤ ਜਵਾਨਾਂ ਦੀ ਸਥਿਤੀ 'ਤੇ ਵੀ ਨਜ਼ਰ ਆ ਰਿਹਾ ਹੈ।ਜਹਾਜ਼ 'ਤੇ ਲੰਬੇ ਸਮੇਂ ਤੋਂ ਮੌਜੂਦ ਹਜ਼ਾਰਾਂ ਸੈਨਿਕਾਂ ਨੇ 200 ਤੋਂ ਜ਼ਿਆਦਾ ਦਿਨਾਂ ਤੋਂ ਜਮੀਨ ਨਹੀਂ ਦੇਖੀ ਹੈ। ਉਨ੍ਹਾਂ ਦੀ ਥਕਾਵਟ ਅਤੇ ਮਾਨਸਿਕ ਦਬਾਅ ਨੂੰ ਲੈ ਕੇ ਉਨ੍ਹਾਂ ਦੇ ਪਰਿਵਾਰਾਂ ਵਿੱਚ ਗੁੱਸਾ ਭੜਕ ਗਿਆ ਹੈ।
ਇੱਕ ਰਿਪੋਰਟ ਮੁਤਾਬਕ, USS Lincoln ਨੇ 21 ਨਵੰਬਰ ਨੂੰ ਅਮਰੀਕਾ ਦੇ ਸੈਨ ਡੀਏਗੋ ਤੋਂ ਆਪਣੀ ਤਾਇਨਾਤੀ ਸ਼ੁਰੂ ਕੀਤੀ ਸੀ। ਹੁਣ ਤੱਕ ਇਸਨੂੰ ਤਾਇਨਾਤੀ ਦੇ 259 ਦਿਨ ਹੋ ਗਏ ਹਨ। ਸਭ ਤੋਂ ਵੱਡੀ ਚਿੰਤਾ ਇਹ ਹੈ ਕਿ ਜਹਾਜ਼ 'ਤੇ ਤਾਇਨਾਤ ਕਰੀਬ 5,000 ਨੇਵੀ ਕਰਮਚਾਰੀ ਅਤੇ ਮਰੀਨ ਲਗਾਤਾਰ 208 ਦਿਨ ਸਮੁੰਦਰ ਵਿੱਚ ਰਹੇ। ਇੰਨੇ ਲੰਬੇ ਸਮੇਂ ਤੱਕ ਸਮੁੰਦਰ ਵਿੱਚ ਰਹਿਣ ਨਾਲ ਜਵਾਨਾਂ ਦੀ ਸਰੀਰਕ ਅਤੇ ਮਾਨਸਿਕ ਸਿਹਤ 'ਤੇ ਦਬਾਅ ਵਧਣ ਦੀਆਂ ਚਿੰਤਾਵਾਂ ਸਾਹਮਣੇ ਆਈਆਂ ਹਨ।
ਅਨਾਦੋਲੂ ਏਜੰਸੀ ਦੀ ਰਿਪੋਰਟ ਮੁਤਾਬਕ, ਸੈਨ ਡੀਏਗੋ ਵਿੱਚ ਵੀਰਵਾਰ ਨੂੰ ਕਰੀਬ 200 ਸੈਨਿਕ ਪਰਿਵਾਰਾਂ ਨੇ ਅਮਰੀਕੀ ਨੇਵੀ ਦੇ ਕਾਰਜਕਾਰੀ ਸਕੱਤਰ ਹੁੰਗ ਕਾਓ ਨਾਲ ਮੁਲਾਕਾਤ ਕੀਤੀ ਅਤੇ ਜਹਾਜ਼ 'ਤੇ ਜਵਾਨਾਂ ਦੀ ਸਥਿਤੀ ਨੂੰ ਲੈ ਕੇ ਸਵਾਲ ਕੀਤੇ। ਪਰਿਵਾਰਾਂ ਨੇ ਕਈ ਮੁੱਦਿਆਂ 'ਤੇ ਚਿੰਤਾ ਜਤਾਈ, ਜਿਸ ਵਿੱਚ ਇੰਨੇ ਲੰਬੇ ਸਮੇਂ ਤੋਂ ਸੈਨਿਕਾਂ ਦੀ ਲਗਾਤਾਰ ਥਕਾਵਟ, ਮਾਨਸਿਕ ਸਿਹਤ 'ਤੇ ਪੈ ਰਿਹਾ ਅਸਰ, ਖਾਣ-ਪੀਣ ਦੀਆਂ ਚੀਜ਼ਾਂ ਦੀ ਉਪਲਬਧਤਾ, ਪਾਣੀ ਦੀ ਗੁਣਵੱਤਾ, ਖਰਾਬ ਬਾਥਰੂਮ, ਸੁਰੱਖਿਆ ਅਤੇ ਡਾਕ ਦੀ ਡਿਲਿਵਰੀ ਵਿੱਚ ਦੇਰੀ ਵਰਗੇ ਮੁੱਦੇ ਸ਼ਾਮਲ ਹਨ।
ਰਿਪੋਰਟਾਂ ਮੁਤਾਬਕ USS Lincoln 'ਤੇ ਬੁਨਿਆਦੀ ਸਹੂਲਤਾਂ ਨਾਲ ਜੁੜੀਆਂ ਕਈ ਸਮੱਸਿਆਵਾਂ ਸਾਹਮਣੇ ਆਈਆਂ ਹਨ। ਕੁਝ ਥਾਵਾਂ 'ਤੇ ਟਾਇਲਟ ਖਰਾਬ ਹੋਣ, ਪਾਣੀ ਦੀ ਗੁਣਵੱਤਾ ਨੂੰ ਲੈ ਕੇ ਸ਼ੱਕ ਅਤੇ ਸ਼ਾਵਰ ਵਾਲੇ ਖੇਤਰਾਂ ਵਿੱਚ ਫਫੂੰਦੀ ਵਰਗੀਆਂ ਸਮੱਸਿਆਵਾਂ ਦੀਆਂ ਸ਼ਿਕਾਇਤਾਂ ਕੀਤੀਆਂ ਗਈਆਂ ਹਨ। ਇਸ ਨਾਲ ਨਾ ਸਿਰਫ਼ ਰਹਿਣ-ਸਹਿਣ ਦੀਆਂ ਸਹੂਲਤਾਂ, ਬਲਕਿ ਸੈਨਿਕਾਂ ਨੂੰ ਮਿਲਣ ਵਾਲੀਆਂ ਕੁਝ ਜ਼ਰੂਰੀ ਸਪਲਾਈਆਂ ਵੀ ਪ੍ਰਭਾਵਿਤ ਹੋਈਆਂ। ਰਿਪੋਰਟਾਂ ਵਿੱਚ ਖਾਣ-ਪੀਣ ਦੀਆਂ ਵਸਤੂਆਂ, ਨਿੱਜੀ ਵਰਤੋਂ ਦੇ ਸਮਾਨ ਅਤੇ ਡਾਕ ਪਹੁੰਚਣ ਵਿੱਚ ਦੇਰੀ ਦੀ ਗੱਲ ਵੀ ਸਾਹਮਣੇ ਆਈ। ਇਸ ਕਾਰਨ ਸੈਨਿਕਾਂ ਅਤੇ ਉਨ੍ਹਾਂ ਦੇ ਪਰਿਵਾਰਾਂ ਵਿਚਾਲੇ ਚਿੰਤਾ ਹੋਰ ਵੱਧ ਗਈ ਹੈ।
ਅਮਰੀਕੀ ਨੇਵੀ ਦੇ ਵਾਈਸ ਐਡਮਿਰਲ ਡਗਲਸ ਵੇਰਿਸਿਮੋ ਮੁਤਾਬਕ, ਸਥਿਤੀ ਹੁਣ ਹੌਲੀ-ਹੌਲੀ ਸੁਧਰ ਰਹੀ ਹੈ, ਪਰ ਅਜੇ ਵੀ ਪੂਰੀ ਤਰ੍ਹਾਂ ਆਮ ਨਹੀਂ ਹੋਈ। ਉਨ੍ਹਾਂ ਨੇ ਇਹ ਵੀ ਮੰਨਿਆ ਕਿ ਕੁਝ ਸਮੇਂ ਦੌਰਾਨ ਹਾਲਾਤ ਕਾਫ਼ੀ ਮੁਸ਼ਕਲ ਰਹੇ।
ਇਸ ਵਿਚਾਲੇ ਸੈਨਿਕ ਪਰਿਵਾਰਾਂ ਦੀ ਸਭ ਤੋਂ ਵੱਡੀ ਚਿੰਤਾ ਇਹ ਹੈ ਕਿ USS Lincoln 'ਤੇ ਤਾਇਨਾਤ ਜਵਾਨਾਂ ਕਦੋਂ ਘਰ ਵਾਪਸ ਪਰਤਣੇ। ਦੂਜੇ ਪਾਸੇ, ਅਮਰੀਕੀ ਨੇਵੀ ਵੱਲੋਂ ਸੰਕੇਤ ਦਿੱਤਾ ਗਿਆ ਹੈ ਕਿ USS Theodore Roosevelt Carrier Strike Group ਨੂੰ ਮੱਧ-ਪੂਰਬ ਵੱਲ ਭੇਜਣ ਦੀ ਤਿਆਰੀ ਕੀਤੀ ਜਾ ਰਹੀ ਹੈ। ਸੰਭਾਵਨਾ ਹੈ ਕਿ ਇਹ ਗਰੁੱਪ USS Lincoln ਦੀ ਥਾਂ ਲੈ ਸਕਦਾ ਹੈ। ਹਾਲਾਂਕਿ ਨੇਵੀ ਨੇ USS Lincoln ਦੀ ਵਾਪਸੀ ਲਈ ਕੋਈ ਨਿਸ਼ਚਿਤ ਤਾਰੀਖ ਨਹੀਂ ਦੱਸੀ। ਅਧਿਕਾਰੀਆਂ ਨੇ ਇਸ ਦਾ ਕਾਰਨ ਆਪਰੇਸ਼ਨਲ ਸੁਰੱਖਿਆ ਦੱਸਿਆ ਹੈ।
